Kyk die DA se televisie-advertensie.
“In ‘n tyd van bedrog is die vertel van die waarheid ‘n revolusionêre daad,” het Eric Arthur Blair, andersins bekend as George Orwell, die mees insiggewende politieke ontleder van die 20ste eeu, gesê.
Hierdie gesegde het my deur dekades van politiek vergesel.
Elke keer as die DA die moed gehad het om ‘n harde, ongerieflike waarheid te vertel, het die kommentariaat van verontwaardiging geween. Dink terug aan ons voorspellings oor kaderontplooiing, SEB, staatskaping, die impak van ons arbeidswette, en natuurlik “Stop Zuma.”
Ons is keer op keer oor die kole gehaal. Ons het ook geblyk reg te wees.
Wanneer die ontleders dit uiteindelik “kry”, herhaal hulle wat ons ‘n dekade vroeër gesê het asof dit ‘n nuwe insig is.
En so sal dit weer wees wanneer hulle die waarheid van ons skerp waarskuwing moet erken dat Suid-Afrika se demokratiese instellings, sowel as ons ekonomie, tot as gaan brand onder ‘n ANC/EFF/MK/PA-koalisie.
Die DA se rol is om alles moontlik te doen om te verhoed dat dit gebeur. Die enigste mense wat die mag het om dit te doen, is die kiesers. Ons het nog drie weke om hierdie punt tuis te bring.
So, wat sou jy doen as jy hierdie harde waarheid met die grootste moontlike impak in ‘n 30-sekonde televisie-uitsending moes oordra?
Dit was die vraag waarvoor die DA te staan gekom het toe ons ons brandende-vlag-advertensie bedink het.
Ons het die Vlag gekies as die duidelikste simbool van die droom wat ons 30 jaar gelede gedeel het, aan die begin van demokrasie onder president Nelson Mandela.
Die vlamme wys hoe sy visie deur 30 jaar van ANC-bewind verwoes is. En ons waarsku dat dit onder ‘n ANC/EFF/MK/PA koalisie heeltemal uitgewis sal word.
Die 30 sekondes eindig met ons vlag wat tot sy eertydse glorie herstel is met ‘n oproep tot aksie vir elke volwasse Suid-Afrikaner: “Red SA, stem DA!”
Hierdie kragtige simboliek het die voorspelde reaksie ontlok.
Moet ons dus enige metafoor of simboliek in ons kommunikasie vermy wat aanstoot of kontroversie kan veroorsaak? Nee! Ons wil oorlog voer teen diegene wat besig is om die droom te vernietig wat eens ons nasie verenig het. Ons wil ons Vlag red.
Omstredenheid help om ons boodskap te dryf.
Ons moet kiesers konfronteer met ‘n duidelike keuse: Brand jy af of bou jy? Dit is die kwessie in hierdie verkiesing. Slegs die DA het die durf, ervaring en rekord om die brandstigters te klop.
In 30 sekondes dra ons in die advertensie oor wat 492 woorde geneem het om hier te ontleed. En gratis, sonder dat dit ons enige iets kos, word ons boodskap ‘n hupstoot gegee deur die brandstof van vervaardigde verontwaardiging.
In die woordeoorlog, tot dusver, gaan die prys vir die mees insiggewende opmerking oor “Die Vlag” aan @riaanafrica, wat op X gepos het: “As jy baie mooi kyk, soos in baie noukeurig, sal jy opmerk dit is ‘n stuk papier en nie ’n munisipale gebou of ’n trein nie.”